„Епл“ мора да плати нешто повеќе од илјада долари на клиент затоа што не испорачале полнач со новиот Ајфон.
Судот во градот Гојанија во Бразил пресуди дека компанијата мора да биде одговорна за продажба на уреди без полначи. Судот заклучи дека практиката на компанијата всушност бара од клиентот да купи два посебни артикли за да може еден од нив да функционира правилно и тоа го нарече „незаконска деловна практика“.
Затоа, на „Епл“ му е наложено да му плати на купувачот 5.000 бразилски реали (1.080 долари) и да му достави полнач. Има 10 дена да го стори тоа, во спротивно ќе мора да плати дополнителна казна, пишува „Унилад“.
Бразилската влада и претходно го казни „Епл“, кој престана да снабдува адаптери за своите уреди уште во 2020 година, а бразилската влада ја казни компанијата со 2 милиони долари заради ова. Компанијата се обиде да се оправда со „грижа за животната средина“.
Сепак, судот заклучи дека кабелот за полнач на „Епл“ работи само со адаптери кои имаат USB-C влез, така што на купувачот му е ограничено кои адаптери може да ги купи. Производите на „Епл“ сè уште се специјално дизајнирани да одговараат само на одреден кабел.
