Народот гледа како Дарко Каевски бега од одговор како тоа од голтар, сега на 30 години има банкарска сметка со четири милиони, додека луѓе во продавниците се тепаат за производи, рече денеска портпаролот на ВМРО-ДПМНЕ, Наум Стоилковски, кој упадна во моментот кога неговиот помлад колега од владејачката партија даваше изјава пред седиштето на ВМРО-ДПМНЕ.
Во изјавата, Каевски обвини дека ВМРО-ДПМНЕ, како што кажа, од голтарска партија преку криминал и корупција станала најбогатата партија во Европа.
На ова Стоилковски реплицира и дека семејството на Дарко Каевски се збогатило со пропаста на „Еуростандард банка“, додека луѓе останале без своите заштеди.
„Народот гледа што се случува, а во СДСМ расте нервозата. Затоа држат пресови во кои безнадежно лажат дека Македонија блеска, дека државните резерви се полни, а тие го штителе стандардот. СДСМ бегаат од избори, затоа што знаат дека ќе завршат пред лицето на правдата“, посочи портпаролот на ВМРО-ДПМНЕ.
