Патник вчера се качил во пилотската кабина на авион на „Американ ерлајнс“ за време на летот од Хондурас за Мајами и го оштетил леталото пред да биде уапсен.
Поради тоа, летот на линијата за Мајами беше одложен неколку часа бидејќи беше неопходно да се обезбеди друг авион, па патниците наместо во вторник, во главниот град на Флорида пристигнаа во средата наутро, со речиси осум часа задоцнување, пренесува АП.
Компанијата објави дека вратите на пилотската кабина биле отворени пред овој инцидент на меѓународниот аеродром во Сан Педро Сула во Хондурас.
„Интервенираа членовите на екипажот, а патникот на крајот беше уапсен од членовите на локалното обезбедување на аеродромот“, изјави портпаролот на авиокомпанијата.
Меѓутоа, како што дознава АП, властите на Хондурас денеска го ослободиле патникот напаѓач бидејќи авиокомпанијата не поднела тужба.
„Нападот и агресијата врз пилотот и екипажот на авиокомпанијата не беа сериозни“, рече портпаролот на безбедносната служба, Едгардо Барахона, објаснувајќи дека обезбедувањето на аеродромот го уапсило напаѓачот и го предала на националната полиција, која го однела во болница на серија тестови.
