Откако руската Дума го одобри повлекувањето на Русија од Договорот за отворено небо (ТОС), Москва е подготвена да им даде на САД уште една можност да се приклучат на договорот, изјави денеска рускиот заменик-министер за надворешни работи Сергеј Рјабков.
„Само пет дена откако Думата донесе одлука за крај на Договорот за отворено небо, на Американците им предадовме документ во кој ја објаснивме нашата позиција и пристап и потсетивме на изјавите на претседателот Бајден за ова прашање за време на неговата изборна кампања“, рече Рјабков во интервју за порталот Лента.
„Дадовме сè од себе во нашите обиди да ги убедиме САД да останат посветени на договорот и посочивме дека тие сè уште имаат можност јасно да ја изразат својата намера да останат потписнички. Ние вложивме максимални напори да ги задржиме САД во договорот и сега веруваме дека би било оптимална и правилна одлука и ние да излеземе од него“, рече Рјабков, пренесува ТАСС.
Тој потенцираше дека Американците се откажале од ТОС и дека во нивниот одговор навеле неточни и ирелевантни податоци што максимално го политизираат ова прашање, покажувајќи дека ниту договорот ниту иднината на европската безбедност не се важни за нив.
На 27 мај американската заменичка-државен секретар Венди Шерман му рече на Рјабков дека САД донеле одлука да не се враќаат во ТОС, објави претходно „Ројтерс“.
Договорот за отворено небо ТОС е во сила од 2002 година и 34 земји се потписнички.
ТОС им овозможува на земјите членки отворено да собираат информации за воените сили и активностите на другите земји членки.
