Германската полиција спроведе голема акција во Солинген, Дизелдорф и Дортмунд против фалсификаторите на таканаречените пасоши за вакцинација.
За време на вчерашната акција, беа извршени претреси во 10 станови и продавници. Акцијата ја водеше централната институција за борба против организираниот криминал во државното обвинителство во Дизелдорф.
„ Во тек е истрага против петмина осомничени под сомнение дека фалсификувале пасоши за вакцинација и ги продале“, рече портпаролот на институцијата.
Според „Билд“, станува збор за луѓе блиски до познатиот турско-арапски криминален клан.
При претрес на становите и продавниците не биле пронајдени фалсификувани пасоши или документи за изработка на такви документи. Сепак, полицијата заплени големи количини на дрога и 85.000 евра во готово.
Патем, во Германија, пасошот за вакцинација сега стана најбараната стока на црниот пазар.
