Во ист ден кога Управата за матични книги склучила половина милионски договор со новоформираната фирма „Новатек Инв“, склучила и договор за набавка на софтвер од 11,5 милиони денари, односно околу 200 илјади евра со фирмата „Аукта“, обвини денеска на прес-конференција, Бране Петрушевски од ВМРО-ДПМНЕ.
Како што нагласи тој, исто како и во случајот со „Новатек Инв“, така и кај „Аукта“ се работи за релативно нова фирма, која е единствен понудувач на огласот и цената на која е склучен договорот слична со проценетата вредност на договорот.
„Во огласот кој го добива ‘Аукта’ покрај најниската цена е ставен и критериумот број на квалитетна изведба. Истата оваа компанија го добила и тендерот во 2019-та година, но тогаш вториот услов не постоел. Тој тендер во 2019-та година и бил и прв тендер кој го добила, откако била формирана, а е за дигитализација на матичните книги во висина од околу 110.000 евра“, посочи претставникот на опозициската партија.
Петрушевски рече дека во 2020, во март, „Аукта“ повторно склучила ист договор со Управата во висина од 357 илјади евра.
„Со ова за софтвер, хардвер и дигитализација Управата за матични книги потрошила вкупно 1,5 милион евра за две години, и тендерите ги добивале фирми кои се формирани непосредно пред објавување на огласите, односно чиј прв тендер бил токму тој добиен од Управата“, кажа пратеникот на ВМРО-ДПМНЕ, кој ги повика надлежните веднаш да отворат случај во однос на овие набавки.
