Човек кој пешачел со кучето на италијанските Алпи преживеал седум ноќи на отворено, по пад во кој го скршил скочниот зглоб.
Спасувачките екипи во четвртокот со хеликоптер забележале маж како лежи во близина на поток во планините северно од Удине, во североисточна Италија. Тој бил покриен со лисја, но во близина го виделе и неговото спасувачко ќебе, пишува Би-би-си.
Мажот (33) бил гладен и жеден, но рекол дека неговото куче од мешана раса, Еш, кое било цело време со него, му помогнало да преживее.
Пронајден бил на надморска височина од скоро 700 метри.
Човекот од Трст бил во дел од долината Вензоне каде немало покриеност со мобилна мрежа. Неговата девојка во средата ја предупредила спасувачката служба. Изминатите години, тој одел на слични прошетки и престојувал во планински колиби и импровизирани засолништа.
