Претседателот на Светското медицинско здружение, Франк Улрих Монтгомери, смета дека медицинскиот персонал не треба да се вакцинира со вакцината на „Астразенека“.
Монтгомери за германскиот дневен весник „Рајнише пост“ изјави дека вакцината е безбедна како и другите вакцини, но помалата ефикасност не може да се игнорира.
„Верувам дека луѓето со поголем ризик од инфекција, кои вклучуваат медицински персонал и негуватели, треба да бидат вакцинирани со поефикасна вакцина“, нагласи тој.
Монтгомери рече дека го разбира медицинскиот персонал кој одбива вакцинација со „Астразенека“, пренесе „Танјуг“.
Кога станува збор за помлади луѓе, кои имаат помал ризик од посериозни болести по заразата, тој верува дека можат да имаат корист од вакцината на „Астразенека“.
Монтгомери бара можност за избор со која вакцина сакаат да се вакцинираат граѓаните.
