Запалени стрништа со ожнеани оризови ниви синоќа го осветлија влезот на Кочани. Нивите гореа и покрај тоа што дуваше силен ветер, со опасност лесно да излезе од контрола.
Навиката да се палат стрништа пo завршувањето на сезоната не е заборавена и оваа година. Кочанчани реагираат дека чадот од запалените остатоци од оризовите насади само ја усложнуваат еколошката состојба и изразеното аерозагадување.
„Очекуваме транспарентно инспекторите да излезат и да соопштат кои ниви и парцели се запалени и чии се овие ниви, какви казни се пропишани за оваа животозагрозувачка ситуација, побара Ана Симонова од здружението „Грин Орг Ко“ од Кочани.
Граѓаните потсетуваат дека инспекторите не можат да се оправдаат дека во широкото кочанско поле не можат да утврдат чија е одговорност за запалените ниви. Дури и ако не знаат во моментот, има ГИС систем кој може точно да покаже чија сопственост е парцелата, реагираат граѓаните.
Земјоделските експерти укажуваат дека при палењето на стрништата почвата ја губи плодноста, а со тоа органскиот дел, хумусот и азотот, и ги намалува приносите.
Бурни се реакциите на јавноста, бидејќи палењето се случува само три дена по организираниот протест против аерозагадувањето на граѓаните на Кочани, кои како виновник ја посочија компанијата „Пејпер Мил“. Таму за денеска беше најавено мерење на загадувањето, чии резултати треба да ја решат судбината на компанијата.
