Владата на Зоран Заев и СДСМ е тотално изгубена. Ветото за почеток на преговорите ја извади на виделина целата нивната неспособност и во сегментот на надворешната политика, рече денеска на прес-конференција портпаролот на ВМРО-ДПМНЕ, Димче Арсовски.
„Заев и Димитров сe одговорни за сите договори, сите отстапки од националните интереси ги правеа во име на Европската Унија, а сега говорат за план Б. Но кој е тој план Б? Има ли пилот во владата? Зошто Македонија менуваше уставно име и дали го смени само за да добие уште едно ново вето“, запраша Арсовски.
Според него, целата јавност им посочувала на владините функционери дека договорите со соседните земји се штетни и не гарантираат европска иднина.
„Затоа и ги прашуваме ако сега имаме вето и ако власта на СДСМ се свесни дека погрешиле, што ќе направат со договорите? Европската иднина се гради со реформи, а не со пазарџиско лажење и лажни ветувања“, нагласи портпаролот на опозициската партија.
Тој оцени дека во изминативе години Македонија станала најкорупмирана држава во Европа, а Заев станал синоним за корумпиран политичар.
„Да имаше Македонија Влада со европски вредности, а не корумпиран картел на власт, бугарското вето немаше да се случи“, додаде Арсовски и порача дека излезот од оваа ситуација е само оставки од Заев, Димитров и Шеќеринска и формирање влада на национален спас.
