Околу милион евра открила полицијата во автомобил кој се поврзува со Драган Ковачевиќ, неодамна уапсениот шеф на компанијата „Јадрански нафтовод“ (Јанаф).
Според загрепската ТВ Н1м, која се повикува на неофицијални информации потврдени од повеќе извори, се наведува дека милион евра биле пронајдени во автомобил кој се поврзува директно со Драган Ковачевиќ, а бил паркиран во Самобор.
Автомобилот бил паркиран на адреса на еден од познаниците на неодамна уапсениот директор на „Јанаф“.
Н1 неофицијално дознава дека се верува оти оваа сума на пари е токму делот од митото што го примил Ковачевиќ, но ниту полицијата, ниту Канцеларијата за сузбивање на корупција и криминал (УСКОК) не сакале да ја потврдат оваа информација.
Според неофицијални информации од претходно, Ковачевиќ ден порано дознал дека ќе биде уапсен, па се обидел да ги прикрие доказите.
„Јутарњи лист“ пренесува дека Ковачевиќ го замолил својот познаник Деан Шпаравац, еден од директорите на компанијата „Алфа стан“, да му дозволи да го паркира својот автомобил во гаражата на неговата вила во Самобор.
Во тој автомобил, наводно и била пронајдена големата сума пари во разни валути, во вкупен износ од околу еден милион евра, како и документацијата што Ковачевиќ сакал да ја сокрие.
Шефот на „Јадрански нафтовод“, Драган Ковачевиќ, неодамна беше уапсен заедно со уште десет лица, под сомнение дека бил дел од корупциски скандал што ја тресеше Хрватска последните денови.
