При уривање на трикатна зграда во западна Индија во понеделникот загинале 39 лица, објавија денеска властите, кои сè помалку се надеваат дека ќе најдат преживеани.
Спасувачките екипи од Националните сили за катастрофи досега успеаја да спасат 20 преживеани од урнатините на трикатната зграда во Биванди, близу Мумбај. Екипите со помош на кучиња трагачи извлекле 39 тела од рушевините на зградата што се урна пред зори во понеделникот, изјави за новинарите портпаролот на службата за спасување.
„Пет лица сè уште се водат за исчезнати и потрагата продолжува“, рече командантот.
Еден од локалните официјални службеници прецизираше дека меѓу загинатите има најмалку осум деца.
Причините за катастрофата сè уште не се познати. Во Индија, уривањата на зградите се релативно чести меѓу јуни и септември за време на сезоната на монсуни, бидејќи обилните врнежи од дожд ги ослабуваат темелите на старите градби.
