Куманово, 16 јуни 2020 (МИА) – Интензивно се работи на уредување на излетничкото место „Студена вода“, објави кумановскиот градоначалник, Максим Димитриевски на социјалните мрежи.
Местото се наоѓа во близина на селото Доброшане во Куманово и изминатиов период се уредува и локацијата и пристапниот пат кој води до излетничкото место кое се уредува со средства обезбедени преку Агенцијата за финансиска поддршка во земјоделството и општина Куманово.
– За уредувањето на излетничкото место, Агенцијата за финансиска поддршка во земјоделството и руралниот развој одвои 8.168.000, а општина Куманово 3.160.000 денари. Градежните активности на терен ги спроведува фирмата „Ибро Комерц“ од Куманово која го доби тендерот, информираа претходно од одделението за комунални дејности.
Студена вода се наоѓа на пет километри од центарот на Куманово и според најавите на надлежните ќе биде место каде граѓаните ќе можат да се рекреираат и да го одбегнат градскиот метеж.
Спортистите и рекреативците често ја посетуваат локацијата и сега, но во иднина, просторот ќе биде опремен со урбана опрема која одговара за излетнички места. Локалитетот партерно ќе биде уреден, предвидено е да има места за одмор, детски катчиња, реквизити за спорт, корпи за отпадоци, стражарска служба.
Согласно проектот, локалитетот ќе биде осветлен и ќе има стражарска служба, ќе се реконструирана чешмата, ќе има паркинг места за посетителите. ам/мс/
