Пехчево, 13 јуни 2020 (МИА) – Два нови позитивни случаја на вирусот Ковид-19 денеска се регистрирани во Пијанечко-малешевскиот регион. Веста ја потврдија од Министерството за здравство, со што бројката на активни случаи во овој регион изнесува тројца пациенти.
Новите два активни случаја се регистрирани во Пехчево, каде од почетокот на пандемијата, бројката на пациенти заразени со коронавирус во оваа општина се искачи на пет лица.
– Од овие пет лица заедно со денешните два случаја, тројца пациенти веќе оздравеа, што е добра вест која веќе им беше соопштена на граѓаните. Се надеваме дека и овие два случаја за кои дополнително ќе ги соопштиме деталите како и на кој начин се заразиле, ќе бидат излекувани како останатите граѓани, истакнаа од Здравствениот дом во Пехчево.
Освен во Пехчево, од активните случаи во Пијанечко-малешевскиот регион, позитивен на Ковид-19 е и еден пациент од Берово. Надлежните од двете општини уверуваат дека мерките за заштита на граѓаните, продолжуваат да се спроведуваат и понатаму.
– Се вршат засилени мерки во угостителските објекти заради почитување на протоколите каде засега се е во најдобар ред и нема казнети угостители. Останатите мерки за дезинфекција како и досега ќе се спроведуваат согласно вообичаената динамика, информираат од двете малешевски општини.
Единствена општина без позитивен случај на коронавирус и понатаму останува Македонска Каменица. Од почетокот на пандемијата досега, жителите на Македонска Каменица не се најдоа на листата на градови каде има активни случаи на вирусот Ковид-19. вс/фф/
