Утрински Весник
Македонија

50. „Марш за ангелите“ – родителите бараат интензивирање на судењето

Image 2026 10 03 205323411.png

Во Кочани денеска се одржа педесеттиот „Марш на ангелите“. Родителите, вообичаено Маршот го започнаа од „Паркот на Револуцијата“, а го завршија пред Судот, со попатни станици во Трговскиот центар, пред зградата на Управата за јавни приходи и пред Полициската станица.

Александар Наунов, татко на починатата Надица, и претседател на Здружениетона граѓани „16 Март 2025 Кочани“, од Трговскиот центар рече дека тие не бараат пресуда од улица, туку редовно закажување на рочиштата, а секое одлагање јасно и јавно да се образложи.


-Ние родителите и семејствата бараме интензивно судење со над 10 рочишта месечно, децидно истакна Наунов. Нашите деца, насилно одземени од нас, нема да се вратат, но вистината и правдата не смеат да изостанат, додаде претседателот на  Здружението „16 Март 2025 Кочани“.

Пред Основниот суд и Обвинителството свое обраќање имаше и Розета Блажева, сестра на починатиот Јорданчо Џамов, од каде побара информации за повеќе постапки и сомнежи за можни кривични дела поврзани со трагедијата од 16 март лани.Таа спомена сомнежи за даночно затајување, неправилности околу издавањето на лиценцата и евентуално фалсификување исправа, давање поткуп и давање награда за противзааконито влијание. Посочи и на  предистражните постапки поврзани со УЈП и Државниот инспекторат за труд.

Блажева од  Обвинителството побара јавно да појасни кои постапки се водат, против кого, за кои кривични дела и до каде е нивната реализација.

-Бараме институциите да постапуваат и да дадат одговори. Правдата мора да важи за сите, порача Блажева, сестра на настрадано момче во пожарот во „Пулс“.

Речиси година и пол подоцна, семејствата на настраданите продолжуваат да протестираат и да бараат целосно расчистување на случајот и одговорност од надлежните институции.

Можете да прочитате

Загаден воздух вечерва во Скопје

Протест за Сара пред СВР Охрид

(Фото) По 13 години чекање, се подготвува отворање на патот од Водно до Сончев Град