Во Кочани денеска се одржа 36-тиот „Марш за ангелите“, посветен на жртвите од трагичниот пожар во кабарето „Пулс“, во кој животот го загубија 63 лица, а над 200 беа повредени.
Маршот започна со едноминутно молчење, а учесниците упатија пораки за правда, одговорност и побрза истрага за случајот. Организаторите повторно побараа од надлежните институции да соопштат до каде е постапката и кога ќе има конкретни одлуки за одговорните.
Како што беше истакнато, протестот е израз на незадоволство од, како што велат, бавната и нејасна истрага, но и од чувството дека правдата се одолговлекува. Дел од присутните реагираа и на информациите дека лица поврзани со случајот непречено располагаат со имот, што дополнително ја зголемува недовербата во институциите.
Од граѓанската иницијатива „Сапорт Кочани“ потсетија дека досега се собрани над 22 милиони денари донации за настраданите, од кои државата наплатила над 2,2 милиони денари персонален данок.
Учесниците порачаа дека маршевите ќе продолжат сè додека не добијат јасни одговори и додека одговорните за трагедијата не бидат изведени пред правдата.
