Специјалниот трибунал за Либан (СТЛ), поддржан од ОН, донесе одлука дека осомничениот припадник на Хезболах кој е во бегство, Салим Ајајаш, осуден за атентатот врз поранешниот премиер на Либан, Рафик Харири, не може да ја обжали пресудата се додека не се предаде, пренесува „Мидл Ист монитор“.
Минатата година, Специјалниот трибунал за Либан во Холандија во отсуство го прогласи Ајајаш за виновен и му изрече пет доживотни затворски казни за убиството на Харири во самоубиствениот бомбашки напад во Бејрут во 2005 година. Харири беше убиен заедно со уште 22 лица во огромен бомбашки напад со камион, во кој беа повредени 226 други луѓе.
Ајајаш (57) одбива да се предаде или да го признае судот. Минатиот јануари, адвокатите на одбраната на Ајајаш ја обжалија пресудата, но мнозинството судии во трибналот одлучија да ја одбијат жалбата.
Судот во изјавата вели дека „правната рамка за постапки во отсуство на СТЛ не предвидува жалба за одбрана во отсуство“, додавајќи дека „бранителот на Ајајаш не бил назначен ниту прифатен од Ајајаш, кој избегал и не е пронајден. Налогот за апсење на Ајајаш е важечки.“
Судот рече дека Ајајаш го задржува правото да се жали на пресудите ако се појави или ако побара повторно судење во согласност со меѓународните стандарди за човекови права.
Ајајаш се соочува со посебна постапка пред Трибуналот за три напади врз политичари во Либан, што треба да бидат отворени во јуни. Во март, САД понудија награда од 10 милиони долари за информации што водат до локацијата или идентификација на Ајајаш.
