Струмица, 12 февруари 2020 (МИА) – Од утре до 15-ти овој месец Струмица ќе учествува на еден од најголемите туристички настани на Балканот, Меѓународниот саем за туризам „Holiday&SPA Expo” што ќе се одржи во Софија, Република Бугарија, соопштија од Општината.
Во друштво на повеќе од 350 изложувачи од регионот и над 20 000 посетители, општина Струмица ќе го промовира „Брендот Струмица“, претстојниот Струмички карневал и туристичката понуда на хотелите од „Дестинација Струмица“.
-Во текот на тридневниот настан, општина Струмица, заедно со претставници на хотел „Вила Парк”, комплекс „Лебедово Езеро” и хотел „Термал лукс и спа“ ќе ги промовираат своите туристички потенцијали и капацитети, но и новите производи и услуги. Посебна цел на саемската промоција на Струмица е привлекување нови туристи и посетители од Бугарија на годинешниот Струмички карневал, кој ќе се одржи на 29 февруари, додаваат во соопштението од општина Струмица.
На саемската манифестација ќе учествуваат компании, водечки туристички агенции и претставници на туристички дестинации од над 25 земји од светот.
Учеството на општина Струмица на Меѓународниот саем за туризам „Holiday & SPA Expo” се реализира во рамките на спроведувањето на проектот „Промоција на туризмот и културата“-ToCulter, финансиран од Европската Унија преку Интеррег-ИПА Програмата за прекугранична соработка со Република Грција 2014-2020 година.рт/скс/
