Британскиот истражувач Дејвид Атенборо го собори рекордот на хоивудската актерка Џенифер Анистон за најбрзо време на достигнување еден милион следачи на Инстаграм.
На возраст од 94 години, бројот на следачи на познатиот натуралист достигна седум цифри за четири часа и 44 минути, според Гинисовата книга на светски рекорди, пренесува „Би-би-си“.
Сер Дејвид Атенборо за првпат се пријави на Инстаграм во четвртокот со цел да ја сподели неговата порака за заштита на животната средина. Во неговата прва објава на социјалната мрежа, тој напиша: „Спасувањето на нашата планета сега е комуникациски предизвик“.
Во своето прво видео, ветеранот рече: „Го правам овој потег и го истражувам овој нов начин на комуникација, бидејќи, како што сите знаеме, светот е во неволја.“
“Континентите горат. Глечерите се топат. Корални гребени умираат. Рибите исчезнуваат од нашите океани. Списокот продолжува и продолжува. Спасувањето на нашата планета сега е комуникациски предизвик”.
Минатиот октомври, ѕвездата на „Пријатели“, Анистон ја достигна пресвртницата за пет часа и 16 минути.
Бројот на луѓе кои го следат Атенборо се искачи на 2,5 милиони во рок од 24 часа. Сепак, тој е на некој начин зад најследената личност на планетава – фудбалерот Кристијано Роналдо, кој има 238 милиони, коментира „Би-би-си“.
