Богатството на руските милијардери годинава паднало за 33 милијарди долари, а ескалацијата на конфликтот во Украина може да доведе до уште позначителен пад на богатството.
Вкупната вредност на богатството на 23 руски милијардери сега е 342 милијарди долари, наспроти 375 милијарди долари на крајот на минатата година, објави „Блумберг“.
Генадиј Тимченко ја предводи листата на милијардери чие богатство е намалено, па неговата финансиска состојба е речиси за една третина пониска, според индексот на милијардери на „Блумберг“, на листата на 500 најбогати луѓе во светот.
Тимченко (69), син на поранешен советски воен офицер, кој го запознал и станал пријател со Владимир Путин на почетокот на 90-тите, сега има богатство од околу 15,8 милијарди долари и најголемиот дел од парите ги заработил од удел во рускиот производител на гас „Новатек“.
Уште еден акционер на „Новатек“, Леонид Михелсон е „потенок“ за 6,4 милијарди долари, а директорот на „Лукоил“, Вагит Алекперов изгубил 3,5 милијарди долари, додека акциите на компанијата паднале за 19 отсто.
