Москва официјално демантираше дека добила барање од Вашингтон за телефонски разговор меѓу двајцата министри за надворешни работи, Антони Блинкен и Сергеј Лавров.
„ Покрај медиумските извештаи за потенцијалниот разговор, ништо не знаеме и не сме добиле никакво официјално барање“, соопштија од Москва.
Американската страна претходно изјави дека Блинкен има намера да разговара со својот руски колега Лавров првпат по руската инвазија на Украина. Наведено е и дека разговорот не треба да биде за преговори за Украина, туку за Американците приведени во Русија и за обновување на украинскиот извоз на жито.
„ Ние во Русија се водиме од вообичаената дипломатска практика“, додаваат од Москва, додека американските медиуми нагласуваат дека САД се подготвени да го разменат Виктор Бут, руски трговец со оружје затворен во САД, кој е осуден на 25 години затвор, за кошаркарката Бритни Гринер и маринецот Пол Вилан, кои се затворени во Русија.