Полска денеска почна да вакцинира со вакцинте на фармацевтската компанија „Џонсон и Џонсон“ бидејќи процената на владата и здравствените власти е дека вакцината има поголема придобивка отколку потенцијален ризик, објави „Ројтерс“.
Федералните власти на САД во вторникот препорачаа да се прекине употребата на вакцината на „Џонсон и Џонсон“ најмалку неколку дена бидејќи шест жени на возраст под 50 години добија згрутчување на крвта по приемот на една доза.
„Во случајот со ‘Џонсон и Џонсон’, денес е првиот ден кога ја користиме вакцината. Не добивме никаков сигнал дека има проблеми, ниту дека некој пациент одбива да ја прими“, рече Михал Дворчик, владин претставник што ја надгледува кампањата за вакцинација.
