Во поетската едиција на издавачката куќа „Макавеј“ од Скопје се појави поетската книга „Поетски дефиниции на нештата“ од современата бугарска поетеса Емилија Авгинова.
Поезијата на Авгинова е целосно упатена кон откривање на поетскиот наратив во сè што нè опкружува и во сè што може да проблесне со онтологијата на своето суштествување. На тој начин, 60-ината песни од книгата на Авгинова ги допираат минорните, дневните и минливите животни драми на човекот, осветлувајќи и озвучувајќи го со поетска дефиниција. Исто така, во еден мисловен и филозофски пандан се отсликани и космичките, недосегливите и заумните прашања за постоењето
воопшто. Песните од книгата се своевидни медалјони претопени и преобликувани од нежната, немирна и божествена духовност на поетесата.
Препевот на книгата од Авгинова на македонски е на Бранко и Владимир Цветкоски. Инаку Авгинова е поетеса, универзитетски професор на Универзитетот „Св. Св. Кирил и Методиј“ во Велико Трново, докажан преведувач на значајни дела од новогрчки јазик и руски јазик и активен истражувач на теми и современи проекти од областа на компаративната и компјутерската лингвистика.
Текстот „Поетски дефиниции на нештата“ од Емилија Авгинова е превземен од МАКФАКС.
