Граѓаните може да бидат спокојни – мерката „Мој ДДВ“ нема да претрпи никакви измени и исплатите ќе продолжат како и досега. Иако директорката на УЈП вчера изрази сомнеж за ефектот на мерката, министерката за финансии Гордана Димитриеска Кочоска денеска потврди дека во Министерството воопшто не се разговара за менување на законот.
„Нема никаков извештај ниту информација до Министерството за промени. Напротив, сè останува како што беше досега“, рече министерката.
Покрај ова, Димитриеска Кочоска соопшти и добри вести за бизнис секторот. Првата рата од враќањето на солидарниот данок на компаниите ќе започне во март годинава, а втората е планирана за март 2027 година. УЈП наскоро треба да ги објави обрасците на својата веб-страница, по што компаниите ќе го добијат својот дел од парите.
