Струмица, 12 јуни 2020 (МИА) – Со уредување на централниот дел на селото Покрајчево со бехатон елементи и урбана опрема, изградба и поплочување на улици во населените места Калугерица и Воиславци, општина Радовиш продолжува да ја подобрува инфраструктурата, информира градоначалникот Герасим Конзулов.
Посочи дека средствата за проектите се обезбедени од општинската каса.
-Реализираме три тендери, од кои два се за населените места и еден за градот. За селата одделивме 12 милиони денари, а за оваа намена во градот ќе потрошиме осум милиони денари. Дополнително се предвидени уште три милиони денари за набавка и поставување на урбана опрема, рече градоначалникот Конзулов.
Покрај овие зафати, тој најави дека за десетина денови се очекува да биде завршено обновувањето на делницата од седум километри од патот кон планината Плачковица. За целосна обнова на овој патен правец останува уште една делница која треба да биде завршена во 2021 година. рт/рп/
