НАТО ги отфрли обвинувањата на белорускиот претседател Александар Лукашенко дека спроведува воени вежби долж западните граници на земјата во Полска и Литванија и нагласи дека внимателно ја следи ситуацијата по спорните избори во Белорусија минатата недела.
Претходно денеска Лукашенко рече дека тенковите и авионите на НАТО биле распоредени само 15 минути од белоруската граница.
Портпаролката на НАТО, Оана Лунгеску изјави дека „не се спроведуваат воени вежби во регионот“.
„ Мултинационалното присуство на НАТО во источните членки на Алијансата не претставува закана за ниту една земја. Тоа е строго одбранбено присуство, чија цел е да ги спречи конфликтите и да го зачува мирот“, рече Лунгеску.
Таа додаде дека НАТО внимателно го следи развојот на ситуацијата во Белорусија, земја во која се одржуваат насилни протести од изборите на 9-ти август, за кои противниците на Лукашенко велат дека се „монтирани“. Лунгеску повика на почитување на основните слободи, вклучително и правото на мирен протест.
