На денешната официјална средба со бугарскиот премиер Кирил Петков, младинската организација на Левицата упати порака до премиерот кој го негира постоењето на Македонците во Бугарија.
„Владата на Кирил Петков ги продолжува негаторските политики на неоврховизмот кон Република Македонија, а Владата на Ковачевски, доколку имаше државотворен капацитет, веднаш ќе ја откажеше средбата по срамната изјава на Петков за непостоење македонско малцинство.
Владата на Република Македонија има уставна должност да се грижи за правата на Македонците во соседните држави, а за шовинистичките политики на бугарските власти говорат 16 пресуди на Европскиот суд за човекови права за кршење на човекови права на македонското малцинство. Лицемерството на европската дипломатија кон Македонија продолжува, која премолчено го одобрува ваквото брутално кршење на човековите права додека користи перфидни методи за притисок и уцени врз македонскиот народ“, велат од партијата.
Од таму додаваат дека на мирниот протест членовите на Левицата со транспарент биле легитимирани од полицијата и задржани повеќе од половина час како своевиден притисок од органите на прогонот при изразување на правото на мирен протест.
„За потсетување, пред неколку дена неофашистички групации парадираа среде Скопје со знамиња на царот Борис, заштитени со придружба од полицијата на Оливер Спасовски“, порачаа од Левицата.
