Британската кралица Елизабета Втора испрати порака до новата Република Барбадос „најтопли, најдобри желби за среќа, мир и просперитет во иднината“ додека го слават својот „посебен ден“.
Во пораката до новата претседателка Сандра Мејсон и граѓаните на карипската држава, кралицата ја пофали нацијата, која има „посебно место“ во нејзиното срце, „нејзината енергична култура, спортска сила и природна убавина“.
Барбадос стана Република на церемонија на која присуствуваа водечки фигури на таа земја, вклучително и премиерката Миа Мотли и суперѕвездата Ријана. Принцот од Велс одржа говор во кој ги истакна трајните врски меѓу Барбадос и Обединетото Кралство.
Кралицата му честиташе на Мејсон кој стана првиот претседател на Барбадос.
„Јас првпат ја посетив вашата прекрасна земја во пресрет на независноста на почетокот на 1966 година и исклучително ми е драго што мојот син е со вас денес“, се вели во пораката на британската кралица.
„Од тогаш, луѓето од Барбадос имаат посебно место во моето срце, ова е земја која со право се гордее со својата енергична култура, спортска сила и природна убавина, земја која привлекува посетители од целиот свет, вклучително и многу од Обединетото Кралство “.
Кралицата додаде дека земјите со години биле партнери врз основа на заеднички вредности, блиска соработка за различни прашања, вклучително и неодамнешната акција за борба против климатските промени.
„Додека го прославувате овој посебен ден, вам и на сите во Барбадос ви испраќам најтопли желби за вашата среќа, мир и просперитет во иднина“, додава кралицата.
Британската кралица е на чело на Барбадос од осамостојувањето на островот во 1966 година.
Со години, имаше национална дебата за Барбадос да се направи Република пред премиерката Миа Мотли да го повлече историскиот потег минатата година.
Кралицата останува на чело на уште 15 земји, а од земјите од регионот на Карибите ѝ остануваат Антигва и Барбуда, Бахамите, Белизе, Гренада, Јамајка, Свети Кристофер и Невис, Сент Лусија и Свети Винсент.
