Висок кинески службеник на Службата за превенција на болестите, Гао Фу, изјави дека владата размислува да ги меша вакцините против Ковид-19 велејќи дека ефективноста на сегашните вакцини не е многу голема, објави „Ројтерс“.
Ефикасноста на кинеските вакцини е помала отколку на вакцините на „Фајзер“ и „Модерна“, но нивниот транспорт и складирање се поедноставни.
„Во моментот достапните вакцини немаат многу високо ниво на заштита“, рече Гао Фу, директор на Кинескиот центар за контрола и превенција на болестите, на прес-конференција во кинескиот град Ченгду.
„Се разгледува имунизација со помош на вакцини со разни технички својства“, рече Гао.
Тој додаде дека преземањето на овие чекори е со цел да се оптимизира процесот на вакцинација, вклучително и промена на бројот на дози и интервалот помеѓу дозите.
Кина разви четири домашни вакцини за јавна употреба, а здравствените власти во саботата рекоа дека државата, најверојатно, ќе произведе три милијарди дози до крајот на годината.
Што се однесува до „Синовак“, ефикасноста на вакцината беше 50 проценти во Бразил, а 83,5 проценти во Турција.
Кога станува збор за „Синофарм“, две студии покажаа дека вакцината е ефикасна 79,4 и 72,5 процента, според првичните резултати.
