Германците дополнително ги зголемија заштедите во изминатата година, така што нивното богатство порасна на рекордни 7,7 трилиони евра, соопштија од германската банка.
„Главната причина за зголемувањето на финансиското богатство на германските граѓани повторно се рекордните заштеди“, вели Мајкл Стапел, економист во банкта.
Тој вели дека стапката на штедење минатата година, иако е помала од 2020 година, сепак била на високи 15 проценти. Тоа значи дека граѓаните на Германија на секои сто евра што им биле на располагање заштедиле по 15.
Во рекордната сума од 7,7 трилиони евра се вклучени класични парични заштеди, хартии од вредност и побарувања од осигурување.
Рекордот со заштеди започна во 2020 година со појавата на првите знаци на пандемијата. Во 2020 година, стапката на штедење беше уште повисока и изнесуваше 16,1 отсто, велат познавачите.
Минатата година, трендот на штедење се намали во текот на летните месеци, кога се чинеше дека пандемијата е во опаѓање.
Зголемувањето на монетарното богатство се објаснува и со поголемата подготвеност на Германците да инвестираат во хартии од вредност.
„Со оглед на ниските, па дури и негативните каматни стапки на заштедите, повеќе граѓани се осмелија да инвестираат во акции минатата година“, заклучуваат економистите.
