Државниот министер за европски прашања во германското Ммнистерство за надворешни работи реагираше на иницијативата на шесте земји на ЕУ поради дистрибуцијата на вакцини против Ковид-19.
Австрија, Бугарија, Хрватска, Чешка, Латвија и Словенија изразија загриженост, тврдејќи дека дистрибуцијата на вакцините не се одвива според популацијата на секоја земја-членка на ЕУ, како што беше претходно договорено, но Михаил Рот ги негираше обвинувањата, пренесуваат европските агенции.
„Тоа беше јасна и транспарентна постапка, каде контингентот беше одреден според бројот на жители за разни вакцини одобрени во ЕУ. Австрија и некои други земји не ги користеа во целост своите контингенти, од причини што јас не сакам да ги оценувам. Потоа беше поставено прашањето до другите земји дали сакаат да нарачаат повеќе дози од неискористените контингенти “, изјавил Рот.
Тој рекол дека не гледа причина да ја смени таа постапка и додал дека „станува збор за правична распределба на дозите на вакцини низ цела Европа“.
Тој исто така кажал дека е важно за Германија да ги вакцинира и жителите и соседните земји и дека тоа не е национална стратегија.
„Можно е заеднички да се преживее кризата, а тоа бара солидарност и еднакви можности. Ако 70% од граѓаните на ЕУ се вакцинираат до летото, нема да има смисла некои земји да имаат повеќе вакцини, а други помалку“, додаде Рот.
