САД се загрижени поради ситуацијата на полско-белоруската граница каде илјадници мигранти се обидуваат да влезат во Европската Унија.
„Мислам дека тоа е многу загрижувачко“, рече американскиот претседател, Џо Бајден.
„Ги пренесовме нашите грижи до Русија и ги пренесовме до Белорусија“, изјави Бајден на новинарите во Белата куќа.
ЕУ го обвинува Лукашенко
ЕУ го обвинува белорускиот претседател Александер Лукашенко дека намерно го поттикнува приливот на мигранти по воздушен пат во Минск, а потоа ги испраќа на границите со Полска, Литванија и Латвија, каде илјадници сега се заглавени во тешки услови.
Како одговор, трите земји значително ја зголемија безбедноста на своите граници.
Несогласувањето меѓу Минск и Брисел трае по изборите во Белорусија во 2020 година и задушувањето на протестите од страна на Лукашенко. Оттогаш, Европската Унија одбива да го признае како легитимен лидер и воведе санкции. ЕУ подготвува нови санкции кои би можеле да бидат воведени следната недела.
