Алек Болдвин избриша еден од своите два профили на Твитер, неколку дена по емотивното интервју за „Еј-би-си њуз“ во кое тој за првпат зборуваше за фаталното пукање на снимањето на Rust.
Сега избришаниот профил на Алек, @AlecBaldwin, претходно се користеше за официјални изјави во врска со инцидентот од 21 октомври. Профилот на фондацијата на Алек, @ABFalecbaldwin, исто така, го нема од понеделникот наутро. Профилот на неговата сопруга Хиларија Болдвин исто така е избришан. Инстаграм-профилите на двете ѕвезди остануваат активни.
На 2 декември, во своето прво интервју по пукањето, Болдвин му кажа на ТВ-водителот Џорџ Стефанопулос што точно се случило на денот на инцидентот и се расплака додека се сеќаваше на сниателката Хачинс. Тој рече дека не сака да чека да завршат тужбите или истрагите пред да ја каже својата страна од приказната.
Американските медиуми пренесуваат дека Алек го држел пиштолот што испука и ја уби Халина Хачинс и го повреди режисерот Џоел Соуза на сетот на филмот Rust. Еден месец подоцна, тој и другите продуценти на вестернот беа именувани во тужбата поднесена од супервизорот на сценариото Мејми Мичел, која наводно стоела на линијата на огнот кога пукнал пиштолот. Истрагата е во тек.
