Скопје, 22 февруари 2020 (МИА) – Јавното претпријатие „Комунална хигиена“-Скопје денеска се приклучи кон иницијативата на Советот на родителите на ООУ „Исмаил Ќемали“ од скопската општина Чаир за спроведување акција за генерално чистење на дворот и околината на училиштето.
Во рамки на акцијата, како што соопштија од претпријатието, учениците заедно со своите родители ги чистеле отпадоците од училишниот двор со помош на екипите на „Комунална хигиена“ кои го подигнале и транспортирале собраниот отпад.
– ЈП „Комунална хигиена“-Скопје секогаш со радост им излегува во пресрет на ваквите иницијативи за чистење на образовните институции затоа што нашите најмлади сограѓани заслужуваат да учат во чиста и здрава животна околина. Овие акции се особено значајни затоа што кај новите генерации ја развиваат свеста за правилно постапување со отпадот, изјави директорот на претпријатието Абдусамед Шабани. мс/мд/
