Куманово, 4 март 2020 (МИА) – Задоволителен е интересот на земјоделците од поширокиот кумановски регион кои се заинтересирани за мерката „Поддршка за поттикнување на земјоделското производство“, информираа денеска надлежните од подрачната канцеларија на Агенцијата за поттикнување на развојот на земјоделството.
Досега, во работната единица подготвени се 12 апликации, некои се уште се во тек на изработка и одговорните очекуваат да се зголеми бројот на поднесени барање до крајниот рок кој истекува за шест дена.
–Интересот на земјоделците е доста голем, се распрашуваат телефонски. Има критериуми со бодирање и штом забележиме дека некој го исполнува минимумот, 60 поени, веднаш им препорачуваме да ја соберат потребната документација. Процедурите околу документација за апликација многу се скратени, поедноставени, олеснети, не само за оваа мерка туку за сите мерки за рурален развој и ИПАРД, изјави раководителот на подрачната канцеларија на Агенцијата за поттикнување на развојот на земјоделството, Џабир Рамадани.
Јавниот повик е отворен до 10 март, годинава, а барање можат да поднесат земјоделците до 40 години возраст.
-Практиката покажува дека секогаш последните денови се аплицира, вели Рамадани.
На јавниот повик кој што беше објавен на 10 февруари годинава, најголем број од земјоделците кои што аплицирале се пчелари, но интерес има за сите гранки од земјоделството. Финансиската поддршка годинава, е зголемена од 10.000 на 20.000 евра и наменета е за сите земјоделски стопанства, каде што носителот е до 40 – годишна возраст, а сакаат да инвестираат во изградба, доградба и опремување на објекти за преработка во сите земјоделски гранки. ам/вг/
