Во гостување на Радио Канал 77, во емисијата „Стадион“, поранешниот градоначалник на Куманово, Зоран Дамјановски – Циц, изрази поддршка за кандидатот на СДСМ за градоначалник на Куманово, Мартин Костовски, оценувајќи дека има сериозни шанси да ја добие градоначалничката функција на претстојните локални избори.
Дамјановски зборуваше и за своите контакти со актуелното раководство на СДСМ, откривајќи дека со поранешниот министер за здравство, Венко Филипче, ретко се сретнуваат, но дека има високо мислење за него.
„Еднаш кога се видовме, ми понуди соработка, но не прифатив поради моите години и политичкиот концепт. Како интелектуалец го почитувам, професионално го ценам, и сметам дека во моментот ги исполнува критериумите за лидер на СДСМ“, изјави тој.
Во разговорот, Дамјановски се осврна и на односите со поранешниот премиер и лидер на СДСМ, Бранко Црвенковски. „Воспоставивме одлични односи по мојата победа на локалните избори во 2006, кога партијата беше во тешка летаргија. Од тогаш сме во одлични релации, често се среќаваме и разговараме за политика. Жално е што Бранко повеќе не е активен во политичкиот живот“, нагласи тој.
