Претседателот на Украина, Володимир Зеленски, смета дека однесувањето на Унгарија и нејзините односи со Русија не соодветствуваат со статусот на членка на НАТО.
Како што пренесува „Европска правда“, тој тоа го кажал пред фински, шведски, дански и норвешки новинари.
„Како да се реши спорот со Будимпешта? Ми се чини дека во Унгарија има политичко заплеткување на политичките елити. Тоа е многу чудна ситуација, дали една земја од НАТО може да биде за Русија и против НАТО“, рече Зеленски.
Според него, членка на НАТО не може да поддржува земја која Алијансата ја нарекува непријател.
„Тоа го сметам за несоодветно однесување. Го кажувам моето субјективно мислење. Да се биде сојузник не е само збор, тоа е значење. Тоа е заедница на држави со ист став за безбедноста, за вредностите. Тие поинаку ги третираат одредени моменти“, рече Зеленски.
Тој додаде дека ако сите членки на НАТО ја нарекуваат Русија непријател, тогаш една земја не може да каже „не, Русија е наш сојузник“.
„Тоа не може да биде така. Затоа, вие повеќе не сте сојузник на алијансата. И затоа, ако сте членка на алијансата, но де факто работите против тоа, не треба да ја советувате Украина да влезе во НАТО или не. И не треба да создавате пречки“, додаде тој.
Унгарскиот премиер Виктор Орбан се спротивстави на изјавата на генералниот секретар на НАТО Јенс Столтенберг за време на неговата посета на Киев дека Украина еден ден треба да стане членка на НАТО.
