Украинскиот претседател Володимир Зеленски изјави дека е спремен да распише референдум за мировниот план предложен од американскиот претседател Доналд Трамп, доколку Русија прифати примирје од најмалку 60 дена. Во телефонско интервју за „Аксиос“, Зеленски истакна дека планот сè уште е предмет на преговори, особено околу чувствителното прашање за можни територијални отстапки.
„Доколку планот бара исклучително тешка одлука за територијата, најдобар пат напред е целиот документ од 20 точки да се стави на референдум“, изјави Зеленски, додавајќи дека организирањето на гласање во воени услови е исклучително сложено.
Според него, прекин на огнот од најмалку 60 дена е неопходен за да се создадат безбедни услови за спроведување на гласањето.
„Ако референдумот не се одржи правилно и безбедно, неговиот резултат може да биде оспорен. Подобро е да не се одржи, отколку граѓаните да немаат можност слободно да гласаат“, истакна украинскиот претседател.
