Украина е решена да остане гарант за светската безбедност на храната и да продолжи да извезува жито, изјави украинскиот претседател Володимир Зеленски за време на разговорот со генералниот секретар на ОН, Антонио Гутереш.
„Разговарав со генералниот секретар на ОН. Ја потврдив посветеноста на Украина на договорот за жито“, напиша Зеленски на Твитер.
Руската армија претходно денес соопшти дека сака Украина да се обврзе дека нема да го користи коридорот за извоз на жито за воени цели.
Русија ги повика ОН, гарант на договорот за извоз на жито потпишан во јули, да помогнат во добивањето гаранции од Украина.
Руските власти во саботата соопштија дека се повлекуваат од договорот за извоз на жито од украинските пристаништа по нападот на Крим, за кој Москва ги обвинува Украина и Велика Британија.
