Украинскиот претседател Володимир Зеленски и британската премиерка Лиз Трас денеска разговараа за поддршката на украинската воздушна одбрана, јавува британски Би-би-си.
Зеленски рече дека разговарал со Трас и дека смета на британското лидерство во зближувањето на меѓународната заедница за да го заштити украинското небо.
Даунинг стрит во Лондон рече дека Лиз Трас силно ги осудува „ужасните напади на Путин врз цивилните области во Киев и на други места денес“ додавајќи дека нападите се „знак за успесите на Украина и зголемениот очај на Путин да одговори“.
Денеска, Русија со проектили ги бомбардира градовите во Украина по голема експлозија претходниот ден кога беше оштетен патно-железничкиот мост преку теснината Керч.
Тој мост ја поврзува Русија со полуостровот Крим, украински регион анектиран од Русија во 2014 година.
Трас рече дека Обединетото Кралство стои од срце зад Украина и дека таа и Зеленски ги поздравиле испораките на британската воена помош што продолжила да тече во Украина.
Таа ја спомена и онлајн-средбата на лидерите на земјите од групата седум (Г7), на која ќе ѝ се приклучи Зеленски.
