Собранието даде зелено светло, сега претседателот Стево Пендаровски ќе го каже својот став за законските решенија за реализација на договорот со „Бехтел и Енка“ за изградба на коридорите 8 и 10-д.
Ставот ќе биде изграден врз основа на анализата којашто тој и неговиот правен тим ќе ја направи за овие закони.
Премиерот Димитар Ковачевски, како што вели, верува во правните познавања на шефот на државата и на неговиот правен тим.
,,Никогаш не ги прејудицирам одлуките на претседателот на државата или на претседателот на Собранието, тие се посебни власти во државата. Јас лично, зборувајќи во мое име, сметам дека се работи за закони коишто се потребни заради изградба и тоа не само на овој проект, бидејќи ако ги погледне законите – се работи за усогласување на нашето законодавство за побрзо, поевтино и поефикасно проектирање и изведба на инфраструктурни проекти во патната, железничката, гасната и електричната инфраструктура во државата“,изјави Ковачевски.
Пендаровски веќе изјави дека нема да го потпише Указот на Законот за работни односи.
