
Здружението за помош и поддршка на лицата со афазија ХОУП во партнерство со ЈЗУ Центарот за рехабилитација на патологија на вербална комуникација – Скопје, ја преточија идејата во реалност и го отворија Првиoт Клуб во Македонија на лица со афазија „Надеж”.
По повеќегодишна соработка со оваа здравствена институција, се реализираше заедничката иницијатива, што е непобитен доказ дека заедничката визија и доверба создаваат трајни вредности за целото општество.
Клубот ќе биде место каде што луѓето кои се соочуваат со тешкотии во говорот најчесто после мозочен удар ќе бидат разбрани, прифатени и поддржани.
Губењето на говорот не значи губење на мислите, чувствата, личноста и потребата да се биде дел од општеството.

Од Здружението за помош и подршка на лицата за афазија „ХОУП”истакнуваат дека нивната мисија станала реалност благодарение на заедништвото, хуманоста и поддршката од граѓанскиот и бизнис секторот:
- Здружението КОНЕКТ ја поддржа првата фаза од проектот, обезбедувајќи финансиски средства преку својот Донаторски кружок.
- „Елена Лука Хоум” (ELENA LUKA HOME), како општествено одговорна компанија, целосно го реновираше просторот.
- „Циклама инженеринг” од Гостивар ги изведе потребните градежни зафати за полесен и непречен пристап на лицата со афазија до Клубот.
- Искажуваме благодарност и до другите општествено одговорни компании од земјата кои донираа финансиски средства и опрема и овозможија овој клуб да стане сигурно пристаниште каде тишината се претвора во разбирање, поддршка и нова надеж за лицата со афазија.
Нека овој Клуб биде место каде што ќе се раѓаат нови пријателства, ќе се враќа самодовербата и ќе се испраќа порака дека никој не треба да биде сам во својата борба.
ХОУП продолжува да создава надеж.
Заедно сме посилни!



