По пријава на Единствениот број за итни случаи 112, Центарот за управување со кризи (ЦУК) информира дека вчера во ресенскиот регион е успешно реализирана акција за спасување на дива мечка, која била заробена во криволовна стапица.
Настанот се случил во атарот помеѓу селата Љубојно и Брајчино, Општина Ресен. Граѓанин кој се движел во близина на мостот на Брајчинска Река го алармирал ЦУК откако слушнал гласно рикање за кое претпоставил дека доаѓа од заробена мечка.
ЦУК веднаш ја координирал ситуацијата и ги известил надлежните служби: граничната полиција од Маркова Нога, полициската станица Ресен, концесионерот – ловното друштво, ветеринарни служби и вработени од НП „Пелистер“.
По пристигнување на терен, потврдена е локацијата и состојбата на мечката. Со помош на ветеринар, таа е успиена на безбеден начин, а потоа и ослободена од стапицата без дополнителни повреди. Акцијата помина успешно и безбедно, како за животното, така и за ангажираните лица.
ЦУК апелира до граѓаните да не поставуваат криволовни стапици и да пријавуваат вакви случаи на бројот 112, бидејќи ваквите постапки не само што се казниви, туку и претставуваат сериозна закана за биодиверзитетот и безбедноста во природните подрачја.
