И покрај тоа што во првите три месеци се реализирани нешто под 10 отсто од предвидените средства, реализацијата на капиталните расходи се одвива според планираното, информира министерката за финансии Гордана Димитриеска-Кочоска.
Од вкупно 47,2 милијарди денари предвидени во државниот буџет за капитални инвестиции во 2025 година, заклучно со 8 април реализирани се 4,49 милијарди денари.
„Слабата реализација во првите месеци е очекувана поради ниските температури и временските услови, кои директно влијаат врз градежните активности. Најголем дел од капиталните расходи се врзани за инфраструктурни проекти, чие темпо се засилува со подобрување на временските услови“, изјави Димитриеска-Кочоска.
Таа нагласи дека Владата останува посветена на реализација на капиталните инвестиции и најави дека во наредниот период ќе има зголемена динамика на изведба, особено во градежниот сектор. „Очекуваме поамбициозно темпо и повисоко ниво на реализација до крајот на годината“, додаде министерката.
