Во македонската амбасада во Пекинг денеска се одржа настан за одбележување на Денот на сесловенските просветители Свети Кирил и Методиј, кој се празнува на 24 Мај.
Нашиот амбасадор во Пекинг Сашко Насев го истакна значењето на овој значаен празник за нас и за нашиот јазик, идентитет и култура, јави известувачот на МИА од Пекинг.
Студенти по македонски јазик од Универзитетот за странски студии во Пекинг ги рецитираа стиховите на Букви од Гане Тодоровски, Глаголица од Анте Поповски и Везилка од Блаже Конески, а ученици и професори од Меѓународното училиште Тсингуа и Британското училиште во Пекинг ги кажуваа стиховите на Т га за југ од Константин Миладинов, Ветрот носи убаво време од Ацо Шопов и Тешкото од Блаже Конески.
Настанот беше збогатен со музичка изведба на Македонско девојче на труба на Адам Матејек од САД.
Пред неколку дена во Пекинг македонскиот амбасадор Сашко Насев на Пекиншкиот универзитет за странски студии одржа предавање по повод Денот на македонскиот јазик.
На Пекиншкиот универзитет веќе неколку години се изучува македонскиот јазик, а во моментот студиите ги посетуваат 25 студенти.
