Додека со нивната реторика, уште од предизборите, ВМРО-ДПМНЕ и ДУИ меѓусебно се напѓаат и заплашуваат со дестабилизација, зад сцената нивната соработка продолжува да се продлабочува и да функционираат како коалиција.
Во Собранието беше изгласан и реализиран еден дел од договорите на позадинската коалиција помеѓу ВМРО-ДПМНЕ и ДУИ за формирање на тело за следење на правичната застапеност на заедниците.
Тоа значи дека, ВМРО-ДПМНЕ, која ветуваше укинување на балансерот пред изборите, сега, во соработка со ДУИ, го издигнува балансерот на повисоко ниво, на ниво на Собранието.
ВМРО-ДПМНЕ беа против било каква соработка со ДУИ, но во итна постапка пратениците од ВМРО-ДПМНЕ го изгласаа предлогот на ДУИ за формирање на собраниска комисија за мониторирање на спроведување на балансерот.
Додека наутро ВМРО-ДПМНЕ и Христијан Мицкоски заплашуваат дека ДУИ планира дестабилизација на земјата, попладне, заедно со нив гласаат закони како да се коалиција. Закони кои се спротивни со тоа што ВМРО-ДПМНЕ го ветуваше и промовираше во предизборниот период.
Дали повторно стануваме сведоци на фингираните етнички конфликти и препукувања на ВМРО-ДПМНЕ и ДУИ, кои гарантираат уназадување на државата во секој сегмент? Ваквата тактика функционираше до 2016, кога ВМРО-ДПМНЕ и ДУИ беа во јавна коалиција и се користеше за покривање на криминалот, корупцијата и оправдување за сите погрешни чекори на тогашната влада.
