Тројца Руси минатата недела поставија светски рекорд скокајќи со падобран од земјината стратосфера на Северниот пол во мисија која послужи и како тест за нов прототип на комуникациски систем за употреба на Арктикот, изјави денеска Никита Цаплин, организаторот на тој потфат.
Михаил Корниенко, Александар Линик и Денис Јефремов скокнаа од леталото Иљушин-76 на височина од 10.500 метри и слободно паѓаа две и пол минути пред да ги отворат своите падобрани на височина од 1.000 метри од земјата, а се е снимено во спектакуларно видео.
Сите тројца падобранци и покрај загреаните маски премрзнале на образите. Тие скокнаа од авионот и паднаа со брзина од повеќе од 300 километри на час, на температура од околу -50 степени Целзиусови, со чувство од -70 степени Целзиусови, изјави Цаплин.
Стратосферата е слој од атмосферата на Земјата кој се протега од 10 километри (околу 8 километри на половите) до висина од околу 55 километри.
Во долниот дел, температурата на воздухот не се менува (околу -56,5 °C над половите и средните ширини, т.е. -85 °C над екваторот), туку поради апсорпцијата на ултравиолетовото зрачење од Сонцето во озонската обвивка, се зголемува полека, а потоа побрзо со висината, а на својот врв достигнува вредности од околу -2 °C.
Михаил, Александар и Денис слетале во близина на руската поларна база Барнео, каде успеале да го напојуваат серверот со помош на дизел генератори и да воспостават врска со сателитот. Опремата претходно беше исфрлена од леталото на помала височина.
