Италијанскиот остров Сардинија започна амбициозна програма за справување со депопулацијата, нудејќи им на новите жители неповратна финансиска помош до 15.000 евра.
Мерката е одговор на сè поизразениот тренд на иселување на младите кон поголемите урбани центри, што доведе до значително празнење на руралните средини. Финансиската поддршка е наменета за купување или реновирање на имот во населени места со помалку од 3.000 жители, при што државата покрива до 50 проценти од вкупната инвестиција.
Согласно условите, корисниците се должни да се вселат и трајно да го пријават живеалиштето во рок од 18 месеци од купувањето.
Покрај ова, локалните власти воведоа и дополнителни социјални мерки за поддршка на семејствата. За првородено дете се исплаќаат 600 евра месечно, додека за второ дете 400 евра, сè додека децата не наполнат пет години.
Со буџет од 45 милиони евра, програмата има за цел да привлече нови жители, но и да ги задржи младите семејства и да поттикне долгорочен демографски раст.
Сепак, право на аплицирање немаат лица кои веќе живеат во мали општини на островот, со што се спречува внатрешна миграција и се стимулира доселување од други региони и држави.
