Кандидатот за градоначалник на Општина Аеродром, д-р Александар Трајановски, во ново видео-обраќање оцени дека општината „не е безбедна и не е дигитализирана“, а најавената визија за „Смарт Аеродром“ останала само на хартија. Централна забелешка е изостанок на општинска мобилна апликација „Мој Аеродром“ преку која граѓаните би пријавувале проблеми директно – „проблемите никогаш не биле поголеми, но нема кој да ги слушне“, вели Трајановски, додавајќи дека недостигаат „паметна урбана опрема“ и бесплатни интернет-зони.
Во образованието и детската заштита, тој тврди дека не е реализирано четирите нови градинки (реално – „ни една“), ниту се реновирани и модернизирани основните училишта, а нема ни нова гимназија. Како единствена мерка што се спровела ја наведува „0 трошок“ за децата во градинките, но со забелешка дека тоа не е придружено со проширување на капацитетите. Во спортот, вели, не е испорачана најавената спортска субвенција од 600 денари месечно за секое дете.
Во урбанизмот и јавниот простор, Трајановски посочува дека не е извршена реорганизација на паркирањето и дека недостигаат „планираните 3.000 нови паркинг-места“. Според него, не постои функционален објект со кино, театар, гејминг-соби, читални и хаб за млади претприемачи. Под ознаката „ЕкоДром“ наведува неиспорачани 100.000 м² ново зеленило, слабо одржување на постојните зелени површини, нереконструиран кеј на Вардар, изостанато воведување „еко-полиција“ и систем за селектирање кабаст отпад. Како нерешени ги набројува и: бездомни кучиња, недостиг од нови и обновени детски игралишта, изостанати велосипедски патеки, сообраќаен хаос, недостиг од клубови за пензионери и нефункционални фонтани. „Имаме време да наброиме што реално направија? Имаме! Ништо не направија!“, завршува обраќањето.
