Властите во Тајланд се обидуваат да лоцираат метален цилиндар со опасна радиоактивна содржина што исчезнал од електрана оваа недела. Тајландските власти ја предупредија јавноста на сериозни здравствени ризици кои можат да настанат во случај на контакт со материјалот во цилиндерот.
Откритието доаѓа само два месеци откако Австралија беше принудена да започне слична потрага за да ја пронајде малата радиоактивна капсула, која на крајот беше лоцирана. За разлика од австралиската капсула, која беше изгубена во оддалечена рурална област, цилиндерот во Тајланд исчезна во многу понаселена област.
Цилиндарот долг 30 сантиметри и широк 13 сантиметри бил пријавен за исчезнат за време на рутинските проверки на персоналот на 10 март во електрана на јаглен во Прачин Бури, провинција во централен Тајланд.
Цилиндерот се користел за мерење на пепел и бил дел од силосот. Во него има цезиум-137, што е високо радиоактивна супстанција за која научниците велат дека може да биде смртоносна.
Тимови за пребарување и беспилотни летала се распоредени за да го пронајдат исчезнатиот цилиндар, се вели во соопштението на Управата за атомска енергија, владиниот регулатор на Тајланд за радиоактивни и нуклеарни истражувања.
Во потрагата е вклучена и тајландската полиција, која смета дека цилиндерот исчезнал во февруари, но дека компанијата National Power Plant 5 официјално го пријавила исчезнувањето дури минатата недела.
